Русини припадаю до славянского конару индо-европских народох. Їх диялект класификовани як восточно-славянски и зродни є українскому язику.

Русини у Европи жию на своїм историйним подручу Подкарпатскей Рус' (Рутения), тераз Транс-Карпатска реґия України, котру у VI и VII столїтю населюю славянски народи, познати як Били Горвати. Русини у Словацкей жию на сиверней часци жеми, ище познатей як Прешовска реґия, а одкадз ше приселєли и нашо предки.

Бреговити край Подкарпатскей Рус' нїґда нє допущел ширшу аґрокултуралну продукцию и векшу индустриялизацию, та як резултат того, Русини, обично худобни и примушени преживйовац зарабяюци у сушедних жемох, або ше селїц до богатших крайох по цалим швеце.

У Австро-Угорскей держави под час владаня Мариї Терезиї, перши Русини зоз Горнїци (так Русини волаю стари край) приселюю ше 1745. року до тедишнєй Долнєй Угорскей до Бачкей  у терашнєй Войводини, до Руского Керестура.

1763. року населюю и Коцур. Процес насельованя тирвал 50 роки. У тих двох валалох, створело ше ядро жительства котре ришело занавше остац у тих крайох. Вибудовали церкви и школи, понеже же Русини ту приходзели як писмени людзе.

Пре високи наталитет, (жительство росло швидше як цо було количество обрабяуцей жеми) Русини ше зоз Керестура и Коцура селя до Сриму и Горватскей. Русини у Горватскей перше населюю Петровци 1831. року, а познєйше и Миклошевци коло 1840 року. На преходзе зоз IX-ого на ХХ-те столїтє, селя ше до Раєвого Села, Пишкоревцох и Долнїх Андриєвцох. Зоз индустриялизацию после Першей, а окреме Другей Шветовей войни, селя ше до векших варошох. У Горватскей найвецей до Вуковару, алє тиж и до Заґребу, Риєки, Винковцох и Осиєку.