У орґанизациї КУД „Осиф Костелник„ зоз Вуковару и соорґанизациї Союзу Русинох и Українцох Горватскей, Ради рускей националней меншини городу Вуковару и Ради рускей националней меншини Вуковарско-сримскей жупаниї та з финанцийну допомогу Совиту за национални меншини  РГ, внєдзелю, 30.новембра 2008.року започало означованє 105. рочнїци од народзеня Осифа Костелника.

После покладаня вецох на гроб Осифа Костелника на теметове у Петровцох, служена панахида у Грекокатолїцкей церкви Христа Царя у Вуковаре а потим, у сутерену церкви отримана пригодна програма о животу и дїлу Осифа Костелника през документи, слики и слова.

О живоце и дїлу Осифа Костелника викладанє отримали писатель Штефан Гудак и доцент др. Стеван Константинович. Попри их викладаньох, члени КУД „Осиф Костелник„ пречитали вибрани твори Осифа Костелника а хор одшпивал даскельо пригодни писнї.

Окремни госц тей преслави була дзивка Осифа Костелника, Блаженка Хорват Костелник, котра присутним виприповедала даскельо фраґменти зоз живота свойого оца. Як гварела, нє могла вельо запаметац бо єй оцец умар кед мал 33 роки а вона у тот час мала лєм 8 роки.

Велї младши Вуковарчанє першираз мали нагоду видзиц панї Блаженку, а тиж так и документи єй оца котри вона подаровала КУД-у „Осиф КОстелник“.

А.Б.