 |
Весело було до рана
У орґанизациї КУД-у Осиф
Костелник, 31. януара отримани 43. бал у готелу Дунай, у
Вуковаре. Стретнуце почало на 19 годзин. Предсидатель дружтва
Зденко Бурчак привитал шицких госцох, у першим шоре нашого
саборского заступнїка Назифа Мемедия, а потим Звонка Костелника,
члена Совиту за национални меншини РГ, Лелу Дїтко предсидательку
Ради рускей националней меншини городу Вуковару, Иринея Мудри,
представнїка рускей националней меншини городу Заґребу, Любицу
Морган, предсидательку Союзу, шицких предсидательох
културно-уметнїцких дружтвох и шицких госцох. Потим слово превжал
наш заступнїк у Собору Назиф Мемеди. Задзековал ше на поволанки и
медзииншим гварел же му мило же ше на тото стретнуце зишло таке
красне число людзох, а бешедовал и о його плану же би поволал на
єдну схадзку представнїкох шицких националних меншинох хтори вон
заступа у Соборе.
У краткей
културно-уметнїцкей програми наступели члени танєчней и шпивацкей
секциї КУД-у Осиф Костелник. Дзецинска танєчна секция ше состої
од двох ґрупох младшей и старшей. Младша ґрупа одтацовала танци:
Повзунєц и Козачок, а старша, або дзивоцка ґрупа: Лавривску
полку и Дзивоцки козачок. Кореоґраф шицких танцох проф. Звонко
Костелник. Хор одшпивал слїдуюци писнї: Преквитай, преквитай,
Вежнї зайду и я зайду, Иванку, Иванку, А я себе порадзим,
Жовти огурки и Волєни Вуковар, на гармоники их провдзел Звонко
Еделински, а дириґовала Агнета Тимко.
Програму троязично водзели:
Любица Гаргай (по руски), Вера Павлович (по українски) и Ирена
Дюдяр (по горватски).
За добре розположенє през
цали вечар остарала ше оркестра Владимира Сивча зоз Нового Саду.
Попри богатей томболи госци
ше могли змагац и у танцу шерца. Найщешлївши того року достали
кажде по торту.
На бал ше зишло 190 особи нє
лєм зоз Вуковару, алє и зоз околних местох. У дворани хотелу
Дунай ше тацовало и шпивало до ранших часох, а и вонка, у
городу, били пахульки весело поскаковали по вуковарских улїцох.
Любица Гаргай
|
