|
Отримана XXV
Културна манифестация "Миклошевци 2010"
У орґанизациї КУД “Яким
Ґовля” зоз Миклошевцох,
а зоз финансийну
потримовку Совиту за
национални меншини РГ, Министерства
польопривреди РГ, Вуковарско-сримскей
жупаниї, општини
Томповци и Союзу
Русинох и Українцох Републики Горватскей,
у Миклошевцох, 28. и 29. авґуста 2010. року
отримана ювилейна XXV
Културна манифестация "Миклошевци 2010" а з тей
нагоди преславена и 60 рочнїца иснованя КУД
“Яким Ґовля” зоз Миклошевцох.
Манифестация започала
соботу рано зоз Медзинародним купом у змаганю лапаня рибох на
дуґов, а участвовали екипи зоз Горватскей и Войводини.
Предлужела ше зоз вечаршу
програму, котра пре нєвигодну хвилю була премесцена до сали
дакедишнього дутяну. Наступел подросток КУД –а „Яким Ґовля“ та
госци, Фолклорни ансамбл "Тарка"
зоз Тарнова,
Република Словацка, КУД
"Обрешка"
з Долнєй Обрешки
(нєдалєко Клоштар Иваничу) зоз Горватскей,
як и ансамбл КПД Русинох и Українцох
"Калїна"
з Риєки.
Нєдзельова програма
започала зоз Службу Божу а дораз потим була отворена вистава
малюнкох Владимира Провчия зоз Матульох. У предполадньових
годзинох до Миклошевцох сцигла и ґрупа бициґлистох
зоз Войводини котри уж традицийно витворюю бициґлистичну руту "По
драги наших предкох".
Дораз по полудзенку,
манифестация предлужена зоз отвераньом вистави Дружтва „Нашо
дзеци“ чийо роботи нащивителє манифестациї мали нагоду опатрац под
цали час тирваня програми.
Пополадньова програма
„Поздрав ровнїни“ започала зоз традицийну писню „Миклошевци“ а
фолклорно-музичну часц отворел КУД „Яким Ґовля“ зоз Миклошевцох.
Потим од наших дружтвох наступели КУД Руснацох и Українцох зоз
Винковцох, КУД "Осиф Костелник" з Вуковару, КПД Русинох и
Українцох з Осєку, КУД " Яким Гарди" з Петровцох, Дружтво Руснацох
Цвелфериї з Райового Села, Дружтво "Руснак" з Петровцох а
участвовали и дружтва других народох и народносцох медзи котрима
були КУД "Петефи Шандор" зоз Чаковцох, Матица Словацка з Осиєку,
КУД "Зрински" з Берку и КУД "Коло" зоз Вуковару".
Нєдзельови вечарши
концерт отримали Музично-танєчни Ансамбл
Дома кулури з Руского Керестура и Фолклорни ансамбл "Тарка" з
Тарнова, зоз Словацкей.
Агнетка Балатинац
|
