|
Крачунски концерт
Миклошевчаньом
У
Миклошевцох, 28. децембра 2008. року, отримани Крачунски концерт
котри миклошевске КУД Яким Ґовля подаровало своїм валалчаньом и
їх госцом, а зоз жаданьом же би шицким тоти швета були ище
святочнєши.
Пред
преполну салу у дакедишнїм дутяну, у 90 минутовей програми, КУД
Яким Ґовля през писню, танєц и рецитованє, представело ище єдну
часц своєй богатей културно просвитней роботи.
Започали наймладши зоз Крачунскима винчованками Тей ше святей
ноци, Ишли троме кральове и Я мали дзиячок, а потим
предлужели зоз колядами Ноц над Вифлеєм, Пречистая дїва и
Пасли пастире. Потим дзеци рижних возростох приказали танєц
Косидба у хореоґрафиї Желька Лїкара. Зоз колядами, котри нїкого
од патрачох нє охабели ровнодушним, предлужела жридлова шпивацка
ґрупа, та кляпканє нє преставало а патраче ше знали и придружиц
шпивачом, окреме кед одгукла коляда Бог предвични. Як зме
дознали, жридлова шпивацка ґрупа КУД-а Яким Ґовля того року
после Саночного шпивала колядї и у церкви, цо ище єдно потвердзенє
успишней роботи и велького закладаня членох Дружтва за очуванє
своєй култури и традицї.
Но,
найвекши аплауз знова лєм достали наймладши кед танцовали танєц И
шумит и гудет, а праве пре свою дзенску спонтаносц и щиросц танєц
бул ище симпатичнєйши, та на лїцох публики мож було замерковац
ошмихи и гордосц зоз хтору провадзели їх наступ.
Дует
Гелена и Ана Бучко, як и вше, зоз своїма прекраснима гласами при
публики вивола цихосц и осторожносц слуханя їх шпиваня, а жридлова
шпивацка ґрупа ище раз потвердзела же з правом освоєли перше место
на фестивалу жридлового шпиваня у Дюрдьове. Шпивачох при писньох
дзе була потребна музика, на гармоники провадзел Юлин Бучко.
През
цалу програму, рецитаторки Мария Сабадош и Сандра Лїкар рецитовали
виривки зоз Идилского венца З мойого валала Гавриїла
Костельника, а у котрих описал праве крачунски час и обичаї при
Руснацох на початку прешлого сторочя.
Програму закончели дзеци зоз танцом Фуяра . Потим предсидатель
КУД-а Яким Ґовля, Мирослав Гайдук, поволал шицких патрачох и
учашнїкох на закуску и друженє, цо векшина и прилапела, та ше
приємна и святочна Крачунска атмосфера предлужела и по законченей
програми.
Агнетка Балатинац
|
