Традиция зажила

 Внєдзелю, 7. децембра 2008. року у орґанизациї КПД Русинох и Українцох Осєку, у такволаним „Шечеранским доме“ у Осєку, отримани 4. „Дравски габи“, стретнуце шпивацких ґрупо Руснацох и Українцох Горватскей. 

Тогорочни „Дравски габи“ отримани у року кед КПД Русинох и Українцох Осєк преславює 25. рочнїцу снованя дружтва.

По привитней писнї, котру вше на початку шпива хор КПД Русинох и Українцох Осєк а пошвецена є городу Осєку, „Мой Осєк“, предсидателька Дружтва, Дубравка Рашлянин привитала шицких присутних и з даскелїма словами приказала роботу Дружтва од початку та по нєшкайши дзень.

На тогорочних „Дравских габох“ наступели вельочислени дружтва а як зме уж написали, започало КПД Русинох и Українцох Осєк зоз писню „Мой Осєк“а  предлужели зоз писнями „Вечар майови„ и „Їхав козак“ под дириґентску палїчку Мирослава Шимовича.

Потим ше шоровали дружтва „Тарас Шевченко“ зоз Канїжи котри виведли писнї „I звiдце гора“ та „Ой плили гусоньки“, КД Руснацох и Укаїнцох зоз Винкковцох зоз писнями „Браца Русини“ и „Загучали гори“, „Карпати“ зоз Липовлянох зоз писнями „Калина“ и „Розпрягайте хлопци конї“ а єдну писню о Славониї, на горватским язику, котру написал член дружтва „Карпатох“, специялно виведли як дарунок домашньому дружтву за їх ювилей.

КУД „Осиф Костелник“ зоз Вуковару, под дириґентску палїчку Агнети Тимко виведол писнї „Иду лїта„ и „Бетяр ши“.

Зоз барз успишним наступом и нову солисткиню, патрачох одушевели члени КПД Русинох и Українцох „Калина“ зоз Риєки а одшпивали писнї „Вечар майови“, „Била мене мати“ и „Ишов козак“.

КПД „Україна“ зоз Славонского Броду одшпивалао три писнї: „Їхали козаки“, „Прощай село“ и „Час рiкою пливе“.

Потим наступело КУД „Яким Ґовля“ зоз Миклошевцох, єдно зоз найчисленших и найуспишнєйших дружтвох Руснацох и Українцох зоз Горватскей. Зоз своїма вельочисленима наступами як у жеми так и у иножемстве заслужели репутацю найуспишнєйших та и з тей нагоди отримали свой уровень и патрачом подаровали нє так часто шпивани а барз красни писнї як цо то: „Крочком коню“ и „Червена ружичка, тулїпан“ а як окремни дарунок патрачом и домашньому Дружтву, за тот час скорей Крачуна, подаровали коляду „В глїбокей долїни“.

КПД Русинох и Українцох Осєк пестує добре сотруднїцство зоз шицкима националнима меньшинами у городу Осєку як и зоз матичним народом та каждохо року, як госцох, поволаю єдно дружтво другей националносци зоз Осєку.

Того року то було македонске дружтво „Брача Миладиновци„ котри виведли венчик македонски народних писньох.

КПД Русинох и Українцох Осєк тиж традицийно поволує и єдно дружтво зоз иножемства а того року то були члени „Дома култури“ зоз Руского Керестура. Дом култури зоз Руского Керестура ма коло 500 аматерох а кед знаме же у Руским Керестуре жиє найвельочисленша Руска заєднїца патраци аж и на простори бувшей держави, вец за обчековац праве таки спектакуларни концерт яки приказали Керестурчанє.

На концу ище треба надпомнуц же конферансу на високим уровню водзели Мария Блотней  и Лидия Стурко.

По официйней програми, як то уж традицийне на „Дравских габох“, друженє ше предлужело зоз вечеру и забаву а окремне подзекованє треба дац орхестри зоз Руского Керестура и Звонкови Еделинскому зоз Петровцох котри нєсебично, цали вечар грали за танєц и шпиванє. У шпиваню им ше приключовали и учашнїки „Дравских габох“ як и госци та випатрало же цала сала єдна компактна екипа котра зложно, и през таки друженя, пестує нашу традицию и културу.

Агнетка Балатинац