|
Мини ювилей КПД
Русинох и Українцох Осєк
Традиция
Дружтва дарунок городу
З
нагоди преслави Дня городу Осєку, 06. децембра 2009. року, КПД
Русинох и Українцох Осєк, по пияти раз орґанизовало манифестацию
Дравски габи смотру хорох и шпивацких ґрупох Руснацох и
Українцох Горватскей.
По привитних словох
предсидательки Дружтва, Дубравки Рашлянин, манифестацию отворел
городоначалнїк Осєку Крешимир Бубало а присутних поздравел и
соборски заступнїк наших националних меншинох Назиф Мемеди.
Потим домашнє дружтво
одшпивало писню котру каждого року дарує свойому городу Мой Осєк
а предлужело зоз писню Калина и Вежнї зайду и я зайду.
Провадзєла их оркестра под руководзеньом Романа Матуса.
Потим ше далєй шоровали хори
и шпивацки ґрупи. КПД Русинох и Українцох Осєк вше поволує єдно
дружтво другей националносци зоз Осєцко-бараньскей жупаниї, а того
року то було здружене мадярске културне дружтво зоз Луґу и
Копачева. Тиж звичайно госцує и єдно дружтво зоз Войводини, алє
того року, пре нєвигодни здравствени обставини, дружтво зоз Кули у
остатнєй хвильки одказало свой наступ.
После домашнїх, патрачом ше
представело КД Руснацох и Українцох зоз Винковцох котре под
дириґентску палїчку Зорана Циковца виведло два шпиванки: За нашим
селом и Шпиваночки мойо. Най надпомнєме же нєдавно знова видали
ДВД та мож заключиц же квалитет котри указую на наступох, вираз
конинуитету у роботи и фахового руководзеня зоз ентузиястами котри
витирвали у очуваню свойого културного скарбу.
КПД Карпати зоз
Липовлянох, як мили госци, дочекани з моцним кляпканьом, а виведли
три писнї и то Ой рида райда, Ой вешенки черешенки и Гай
зелененйкий КУД Осиф Костелник тиж одшпивало три писнї медзи
корима були Ой, чорна я си чорна, Зохабям свой валал и Ишло
дзивче по воду.
По перши раз зме мали нагоду
послухац членох КПД Андрий Пелих зоз Шумеча а одшпивали писнї
котри того року научели на Лєтней школи Ой на гори два дубки и
Ой на гори цигани стоя.
Як цукер за конєц наступело
КУД Яким Ґовля зоз Миклошевцох, єдно од наших найактивнєйших и
найнаградзованших дружтвох, а одшивали Нє пий коню воду, Ей,
желєне, желєне и По цалим швеце. По законченей першей часци
програми, друга часц менєй службова а состої ше од друженя шицких
дружтвох, вименьованя искуствох и шпиванкох, як и шпиваня шицких
вєдно же би ше и на тот способ затримал континуитет у пестованю
красного шпиваня на мацеринским язику.
Най ище надпомнєме же
конферансу водзела Лела Дїтко, а манифестация ше отримала зоз
финансийну потримовку Совиту за национални меншини РГ и городу
Осєку.
А. Балатинац
|
