 |
Бал у Осєку
На балу КПД Руснацох и
Українцох Осєк, дзе ше позберало коло 130 людзох, перши раз
наступел и оркестер КПД Руснацох и Українцох Осєку под
руководзеньом Романа Матуса.
У Осєку, 28. фебруара 2009. року КПД Руснацох и Українцох Осєк,
отримало свой XXII
бал. На истим месце як и влонї, у готелу „ЗОО“ зишло ше коло 130
людзох зоз рижних местох Горватскей.
Як уж звичайно, шицких присутних привитала предсидателька Дружтва,
Дубравка Рашлянин, а потим наступел домашнї хор КПД Руснацох и
Українцох Осєк зоз писнями „Вечар майови“ и „Їхав козак“ а под
руководзеньом Мирослава Шимовича.
Осєчанє вше як госцох поволую єдно з наших културно-уметнїцких
дружтвох, а уж други рок за шором, то КУД „Яким Ґовля“ зоз
Миклошевцох. Зоз богатим репертоаром танєчней и шпивацкей ґрупи,
як и зоз дуетом Гелени и Ани Бучко, та соло наступом Гелени Бучко,
приказали цалу лепезу прекрасних танцох и писньох.
По перши раз того року, представел ше и оркестер КПД Руснацох и
Українцох Осєку, хтори ма аж осем членох, та гоч розличного
возросту, алє єднак цеплого шерца за нашу музику. Оркестер увежбал
и з нїм руководзи Роман Матус.
Традицийно, ту ше нашла вше богата томбола, а главна награда, LCD
телевизор, пошла до Вуковару.
Танєц шерца ма вше даяку специфичносц при Осєчаньох та є нїґда нє
лєм шерцо виштригнуте з паперика на котрим написане число. Того
року то були чаривни палїчки у белавей и червеней фарби.
Зачаровала Агнетку Дїтко и Мирослава Гайдука та вони постали
побиднїцка пара, а за награду кажде достало по торту и фляшу вина.
За добре розположенє постарал ше оркестер Владимира Сивча зоз
Нового Саду, хтори уж роками вирни гудаци на Осєцким балу.
Понеже Осєчанє нє маю часто нагоду слухац таких добрих шпивачох як
цо то Агнета Тимко и Звонимир Кочиш, случує ше же им нє даю анї
оддихнуц, та оркестер грає, так повесц, нєпреривно.
Нє можеме повесц „кед перши когути закукурикали“ алє повеме, кед
ше мешачок рихтал спац а слунко ставац, госци балу ше
порозиходзели зоз поздравом „Видзиме ше и нарок на балу у Осєку“.
А. Балатинац
 |
