 |
ЕКУМЕНСКЕ
СТРЕТНУЦЕ У ВУКОВАРЕ
”Най буду як єдно у
твоєй руки”
Молитвова осмина за
єдинство християнох тирвала од 18. по 25. януар 2009.року. Тема
того року була “Най буду як єдно у твоєй руки” (Езекиел 37,17). А
о чим ше роби? Давид, перши жидовски краль, уєдинєл шицки дванац
племена Израелово до єднохо моцного кральовства. Його син Саламон
кральовство ище баржей воздзвигнул. После його шмерци кральовство
ше розпадло на два часци. Перша часц було Южне, або Юдейске
кральовство, хторе основали племе Юда и Бенямин, з главном городом
Єрусалимом. Друга часц було Сиверне, або Израелске кральовство,
до хторого вошли други дзешец племена, а з главним городом
Шекемом. У тим Южним кральовстве жил пророк Езекиел, хтори зоз
своїм народом одведзени до Бабилонского рабства и од тамаль вец
проковал слова хтори того року вжати як мото молитвовей осмини.
У Вуковаре екуменске
стретнуце за єдинство християнох отримане 21. януара у
римокатолїцкей церкви “Св. Филипа и Якова”. На стретнуцу були
присутни вирнїки зоз Адвентистичкей церкви,
Еванджеоско-пентакосней церкви и Католїцкей церкви (римокатолїки и
грекокатолїки). Стретнуце почало на 19. годзин. Окрем велїх
вирних, присутни були и молитву водзели, пастире уж спомнутих
церквох. Спред грекокатолїцкей церкви “Христа Царя” бул парох
вуковарски о. Владимир Маґоч. Тиж так були присутни: пастор Мариян
Першинович зоз Християнскей Адвентистичней церкви, пастор Зоран
Хоцхбаум зоз Еванджеоско-пентакосней церкви, влч. Мато
Мартинкович зоз римокатолїцкей церкви “Кралїци мученїкох” и
домашнї паноцове и дякон, фра Ґордан Пропадало, фра Ивица Яґодич
и фра Томислав Смилянич. Од шпивацких ґрупох були присутни и
шпивали християнски шпиванки: хор ”Св. Цецилиї” и хор младих зоз
церкви “Св. Филипа и Якова”, хор младих з Еванджеоско-пентакосней
церкви и хор КУД-а “Осиф Костелник” спред грекокатолїцкей церкви
“Христа Царя”. Вшелїяк мушиме спомнуц и часни шестри Василиянки и
часни шестри св. Крижу, хтори зоз своїм присуством збогацую кажди
таки и подобни стретнуца.
После молитви шицки присутни
поволани до пасторалного центру “Св. Боно”, дзе пририхтани
зєднїцки аґапе, а на столє ше медзи иншим нашли и череґи хтори
зготовели вредни руски руки.
Любица Гаргай
|
