Дюрдьов, 17. януар 2012.

МИНИ ЮВИЛЕЙ РУСНАЦОХ У СЕРБИЇ

У Дюрдьове, 15. януара 2012. року, отримана централна шветочносц означованя 17. януара - Националного швета Руснацох у Сербиї.

Централна шветочносц почала пополадню, з презентацию Програми защити „Рускей школи” у Дюрдьове а предлужела ше у Церкви Рождества Пресвятей Богородици дзе на 17 г., апостолски еґзарх за грекокатолїкох Сербиї и Чарней Гори, кир Георгий Джуджар служел Благодарну Архиєрейску Службу Божу. Сослужовали дзевецме священїки з домашнього Апостолского еґзархату, а Службу шпивал дюрдьовски Хор „Розанов”.

Потим у просторе ткв. „Ленки”, отворена вистава подобових роботох з назву „Подобова ґрупа - Дюрдьов”, на хторей по штири роботи викладали 11 подобово творителє з Дюрдьова.

У вечарших годзинох у Велькей сали Дому култури у Дюрдьове започала пригодна културно-уметнїцка програма котру ТВ Войводина – руска редакция, преношела директно.

Медзи визначнима госцами була и делеґация зоз Горватскей а предводзел ю предсидатель Координациї рускей националней меншини РГ, Йоаким Ерделї.  

На Шветочней академиї учасц вжали визначни интерпретаторе руских шпиванкох як и Жридлова ґрупа КУД „Тарас Шевченко”, та Младежска ґрупа дюрдьовского КУД-а. Шветочну академию отворел хор „Розанов“ зоз гимну Сербиї и Шветочну шпиванку Руснацох у Сербиї „Браца Русини” а одшпивали и „Писню о Руснакови” котра при публики виволала здогадованя на Руснацох розошатих ширцом по швеце. Єден з наймоцнєйших аплаузох достала шпиванка „Ноцна писня“ котру виведли Марко Радишич, Верица Салонски и Константин Чордаш. Шицких шпивачох провадзел Национални оркестер, под дириґентску палїчку Юлияна Рамача Чаму и Тамбурови оркестер дюрдьовского КУД „Тарас Швеченко”, хторих водзи Михал Лїкар. Обидва оркестри мали и свойо власни точки.

Яким Чапко, поета з Дюрдьова, читал свойо стихи а рецитатор Александар Мудри з Кули гуторел стихи дюрдьовских поетох и писательох. На концу програми, шицки вєдно, учашнїки и госци, одшпивали „Многая лїта“ а потим друженє наставене у просторийох КУД „Тарас Шевченко” под назву „ Дюрдьовски вечар“, дзе ше могло засмачиц зоз традицийнима рускима єдлами алє и присмачками зоз удатней кухарскей роботнї як и зоз колачами а нашла ше ту и торта за ище велї преслави „Дня Руснацох Сербиї“ у будучносци.

На марґинох преслави Швета Руснацох Сербиї отримане и крадке стретнуце помедзи делеґацию Координациї рускей националней меншини РГ та Националним совитом Руснацох Сербиї дзе порадзени датум идуцого стретнуца котре ше отрима у Горватскей а ма за циль злєпшованє сотруднїцства з двох бокох Дунаю и розвиваню дїялносцох на хасен Руснацом у обидвох державох.

Главни орґанизаторе програми Централней шветочносци означованя Националного швета Руснацох у Сербиї були Завод за културу войводянских Руснацох, Орґанизацийни одбор Централней шветочносци, Национални совит Руснацох и КУД „Тарас Шевченко”, Дюрдьов.

Медийну потримовку давали Радио-телевизия Войводини, „Руске слово” и Рутенпрес.

(аба)