Осиєк, 23. януар 2012.

РЕТРОСПЕКТИВА ПУБЛИЦИСТИЧНЕЙ ТВОРЧОСЦИ ДЮРИ ЛЇКАРА И У ОСИЄКУ

У орґанизациї представнїка рускей националней меншини Осєцко – бараньскей жупаниї Агнетки Балатинац и КУД Руснацох Осиєк орґанизовани ретроспективни приказ публицистичней творчосци Дюри Лїкара.

Пред нєвельким числом Руснацох и любительох руского писаного слова, учитель у пензиї, Дюро Лїкар, представел 8 кнїжки котри написал у 40 рочней публицистичней творчосци. У кнїжкох описани живот Миклошевчаньох од масовнєйшого присельованя 1850. року та по нєшка.

През вецей од 1700 боки писаного материялу и през вецей як 500 фотоґрафиї, читателє ше маю нагоду упознац зоз розвойом Миклошевцох од самого приселєня Руснацох та по нєшкайши днї. Дзепоєдни кнїжки обробюю окремни подручя та су сами за себе цалосц, як цо нпр. „Спортске дружтво Русин“ лєбо „25 Миклошевски блїскавки“ (о манифестацийох у Миклошевцох)  а вєдно з другима уподполнюю слику о Миклошевцох и Миклошевских Руснацох. Автор ше намагал през публицистични приказ приблїжиц читательом длугорочни труд Миклошевчаньох за злєпшованє стандарду животу у тим малим стредку, та маме нагоду читац о рижних активносцох котри ше поднїмали же би валал постал место дзе ше людзе буду присельовац и оставац. Так можеме пречитац же Миклошевци 80 – тих рокох прешлого столїтя процентово спадали до шора наймаєтнєйших валалох.

Шицки тоти обсервациї алє и факти зоз усней бешеди, котру учитель Лїкар записовал од вчасних 60-тих рокох прешлого столїтя, та по виглєдовацки активносци котри автор зробел же би цо вирнєйше могол провадзиц живот Миклошевских Руснацох, у котрим и сам активно, як живи шведок участвує полни 71 рок, резултовали тоти 8 кнїжки котри представени у Осиєку.

1974. року друкована брошура 40 РОКИ ФОДБАЛА У МИКЛОШЕВЦОХ,

2003.року 70 РОКИ СПОРТСКОГО ДРУЖТВА „РУСИН“ и ХРОНЇКА РУСНАЦОХ У МИКЛОШЕВЦОХ,

2005. 85 РОКИ КУЛТУРНЕЙ ДЇЯЛНОСЦИ У МИКЛОШЕВЦОХ

2006.року 155 РОКИ ШКОЛСТВА У МИКЛОШЕВЦОХ.

2009. року  НАЙШЕ НЄ ЗАБУДЗЕ – РУСНАЦИ У РГ

2010. року 25 МИКЛОШЕВСКИ БЛЇЗКАВКИ о 25 културних манифестацийох у Миклошевцох.

2011 - „Колїше ше жито класате – ґаздованє миклошевских Руснацох“.

О кнїжкох бешедовал сам автор а виривки пречитали Ксения Лїкар и Агнетка Балатинац. Модератор була Агнетка Балатинац а КУД Руснацох Осиєку одшпивал три шпиванки. Провадзела их  тамбурова оркестра Дружтва.

По службовей часци програми ушлїдзело друженє дзе була нагода же би присутни побешедовали зоз автором и достали на дарунок дзепоєдну зоз кнїжкох.  Сам автор подаровал КУД-у Руснацох Осиєк комплет своїх виданьох котри превжал подпредсидатель Дружтва Владо Еделински.  

 Агнетка Балатинац

(аба)