Петровци, 11. и 12. юни 2011

Фото албум

Отверанє вистави

Промоция кнїжкох

Музично-литературни вечар

Покладанє венцох

Служба Божа

Дзвончок

Дзвон

38. Петровски дзвон

Под високим покровительством Совиту за национални меншини РГ а у орґанизациї Союзу Русинох и Українцох РГ и КУД „Яким Гарди“ Петровци, у Петровцох, 11. и 12. юния 2011. року отримана  централна манифестация културин Русинох и Українцох Републики Горватскей – 38. „Петровски дзвон“.

 Всоботу, 11. юния у пополадньових годзинох у Етноґрафскей збирки Русинох и Українцох РГ була отворена вистава ретроспективи подобових колонийох Альмаш котри орґанизує КУД Руснацох Осиєк. Виставу отворела предсидателька КУД Руснацох Осиєк, Дубравка Рашлянин.

У предвечарших годзинох отримана промоция кнїжкох у виданю Союзу Русинох и Українцох РГ. Промотор була главна и одвичательна редакторка Вера Павлович а промовировала кнїжку Павла Головчука – Наши долї, Думки з Дунаю и зборнїк роботох зоз фахово наукового совитованя з нагоди 40 рочнїци Союзу а котри пре оправдани причини вишол аж тераз.

Музично литературни вечар бул пошвецени 80. рочнїци од народзеня Штефана Гудака, 40. рочнїци часопису „Нова Думка“ и 140. рочнїци од народзеня Лесї Українки.

Госцох, медзи котрима були Драґица Холокер Радумило, прочелнїца за културу городу Вуковару, Любица Морган, предсидателька Союзу Русинох и Українцох РГ та висланїк Крижевского владики мсґр. Николи Кекича, мр.сц. Владимир Седлак, Петровски парох, привитал Звонко Костелник, член Совиту за национални меншини РГ.

Учасц вжали руски и українски писателє а медзи нїма бул и ювилант, Штефан Гудак. О дїлу Штефана Гудака бешедовала Ирина Гарди Ковачевич.

Музично вечар преткала женска шпивацка ґрупа КУД-а „Яким Ґовля“ зоз Миклошевцох а од писательох наступели Агнета Бучко Папгаргаї, Агнетка Костелник Балатинац, Звонко Барна, Ганча Гаргаї Папандриш, Йоаким Пушкаш, Славка Плишка и Любица Гаргай. О Лесї Українки бешедовала и поезию рецитовала Леся Мудри а о 40. рочнїци Новей думки, Вера Павлович.

Конферансу водзели Анита Надь и Давид Морган.   

Нєдзельова програма почала зоз покладаньом венцох на памятнїк погинулим у отечественей войни на Петровским теметове.

Потим ше пошло на Службу Божу а вец на 11 годзин започала манифестация наймладших – „Петровски дзвончок“. Отворел ю дожупан Вуковарско - сримскей жупаниї Мато Ґолубичич.

Як и каждого року, манифестация була барз нащивена а виступели дзеци зоз културних дружтвох и основних школох. Були то: КУД „Яким Ґовля“ зоз Миклошевцох та школски дзеци хтори ходза на виучованє мацеринского язику, Основна школа Антун Бауер Вуковар, Подручна школа Петровци, одзелєнє руского язику, вец школяре зоз истей школи алє зоз оддзелєня за українски язик. Як окремни госци пришол подросток КУД „Зрински“ зоз Берку а вец ше патрачом представела младша ґрупа „КУД „Яким Гарди“ зоз Петровцох, потим подросток КУД „Осиф Костелник“ зоз Вуковару а вец старши дзеци зоз КУД „Яким Гарди“ Петровци. Дзециньску манифестацию завар подросток КУД „Андрий Пелих“ зоз Шуметя.

 Пополадньову програму, котра звичайно приказує досяг рочней роботи наших културних дружтвох, отворел велепосланїк України у РГ Олександр Левченко.

Михал Голик, як и каждого року одшпивал писню „Петровски дзвон“ котра означує же на бини, идуци даскельо годзини, запаную танєц и писня. Провадзела го оркестра КУД „Яким Гарди“ зоз Петровцох под руководзеньом Звонка Еделинского.

Наступели КУД „Яким Гарди“ зоз Петровцох, КУД Руснацох Осиєк зоз Осиєку, КУД „Яким Ґовля“зоз Миклошевцох, КУД „Славко Янкович“ зоз Роковцох – Андрияшевцох, „Калїна“ зоз Риєки, КУД „Браче Банас“ зоз Йосиповцу Пунитовачкого, КУД „Осиф Костелник“ зоз Вуковару, КУД „Янковци“ зоз Старих Янковцох, УКМД „Андрий Пелих“ зоз Шуметя, КУД „Цвелферия“ зоз Райового Села, КУД „Иван Домац“ зоз Привлаки, КД Руснацох и Українцох Винковци а манифестацию заварло домашнє КУД „Яким Гарди“ зоз Петровцох. Конферансу водзели Марияна Вовк, Виолета Мазур и Давид Морган. 

Агнетка Балатинац