Войводина, 3. децембра 2011.

РЕТРОСПЕКТИВА ПУБЛИЦИСТИЧНЕЙ ТВОРЧОСЦИ ДЮРИ ЛЇКАРА У ВОЙВОДИНИ

У децембру у Войводини означени 21. днї Миколи М. Кочиша и 5. Поетски нїтки Меланиї Павлович. З тей нагоди 8. децембра отримана ретроспектива публицистичней творчосци учителя Дюри Лїкара у Коцуре и Новим Садзе.

Пред красним числом нащивительох у коцурскей библиотеки Лїкар представел шицки свойо потерашнї виданя: од першей „70 роки спортскей дїялносци у Миклошевцох (2003)“ по остатню „Колїше ше жито класате“ хтора з друку вишла тей єшенї. Було то перше Лїкарово стретнуце зоз Руснацами у Коцуре и вон их з тей нагоди обсяжно упознал зоз шицкима аспектами живота його родимих Миклошевцох: присельованє перших Руснацох, демоґрафски обставини, розвой валала, школства, култури, привреди и спорту. Було то за велїх стретанє зоз нєпознатима фактами живота и роботи миклошевских Руснацох. Виривки зоз кнїжкох и дзепоєдни рецензиї читали його супруга учителька Ксения и нєвеста, тиж Ксения, професорка горватского язика и кнїжовносци. На концу автор коцурскей библиотеки подаровал комплет своїх виданьох, а дзепоєдни кнїжки подзелєл и нащивительом. После промоциї госци зоз Миклошевцох вєдно зоз домашнїма, медзи хторима були др Юлиян Рамач и учительки Татяна Мученски и Снежана Шанта, обишли домашню Етноґрафску збирку.

У пополадньових годзинох истого дня у Руским културним центру у Новим Садзе тиж отримана ретроспектива Лїкарових виданьох. На самим початку Дюра Лїкар отворел виставу дзецинских подобових роботох зоз потерашнїх колонийох „Стретнуце у Боднарова“. Водителька проф. Ирина Папуґа спред Дружтва за руски язик, литературу и културу бешедовала о творчосци Дюри Лїкара, хтора була и рецензент двох його кнїжкох. За остатню кнїжку „Колїше ше жито класате“ Дружтво за руски язик було совидаватель и обявело ю у Едициї „Одняте од забуца 13“.
Под час ретроспективи члени хору „Гармония“ одшпивали даскельо народни шпиванки. Як и у Коцуре так и ту пречитана рецензия остатнєй кнїжки дипл. инґ. Звонимира Ерделя, виривки зоз дзепоєдних кнїжкох, а автор обсяжно бешедовал о вкупно своєй публицистичней роботи. У розгварки участвовали учитель Штефан Гудак и бувши педаґоґийни совитнїк класней настави општини Вуковар Срето Батранович.

По законченю предсидатель Месного одбору Дюра Бики Дружтву за руски язик подаровал шицки Лїкарово виданя, а присутни себе повиберали кнїжки за хтори були найвецей заинтересовани. Як памятку на нащиву Новому Саду Хелена Фейди Крклюш Лїкаровим подаровала свой малюнок „Єшень на Фрушкей гори“.

Ксения Лїкар