Осиєк, 3. децембра 2011.

Тамбурова и хорска секция КУД-а Руснацох Осиєк

опатрице
крадки филм
 

7. „Дравски габи“ – стретнуце хорох и шпивацких ґрупох Руснацох Горватскей

З нагоди Дня городу Осиєку, КУД Руснацох Осиєк уж седми раз орґанизує манифестацию „Дравски габи“, стретнуце хорох и шпивацких ґрупох Руснацох.

Всоботу, 03. децембра, дзень скорей виберанкох за Собор РГ, у Осиєку у ткв. „шечеранским доме“, отримани 7. „Дравски габи“, стретнуце хорох и шпивацких ґрупох Руснацох РГ а котри члени Союзу Русинох и Українцох РГ.

Першираз того року на „Дравских габох“ наступело и Дружтво „Руснак“ зоз Петровцох котре нє член Союзу Русинох и Українцох алє  Шветового Конґресу Русинох, Руснацох и Лемкох.

По привитних словох предсидательки КУД Руснацох Осиєк Дубравки Рашлянин, присутних поздравел городоначалнїк Осиєку Крешимир Бубало, наглашуюци мултикултуралносц городу и отворене шерцо шицких националних меншинох єдних спрам других як и самого векшинского народу.

Манифестацию отворело домашнє дружтво зоз традицийну поздравну писню свойому городу „Мой Осиєк“ цо источашнє и єдина шпиванка котра ше шпива по горватски на тей манифестациї. Предлужели зоз хлопску шпивацку ґрупу и шпиванку „Ей, дзивчата“ а вец виведли два нови шпиванки котри под руководзеньом Ани Бучко увежбали праве за тоту нагоду – „„Чарна горо“ и „А дзе идзеш Геленко“. Провадзела их тамбурова оркестра под руководзеньом Рудолфа Ерґотича.

Стретнуце предлужели члени КД Цвелферия зоз Райового села а вец ше шоровали КУД „Осиф Костелник“ зоз Вуковару, КД Руснацох и Українцох зоз Винковцох, женска жридлова ґрупа КУД-а „Яким Ґовля“ зоз Миклошевцох и Дружтво „Руснак“ зоз Петровцох.

Госци стретнуца були Матица Словацка зоз Осиєку и РКУД „др.Гавриїл Костельник“ зоз Кули зоз Войводини.

Конферансу водзели Ива Мудри и Мария Ґреґич.

У другей часци манифестациї отримане стретнуце котре ма за задачу предлужиц пестованє рускей шпиванки и прешириц приятельства медзи Руснацами зоз рижних крайох Горватскей, же би ше и на тот способ очувало културни скарб.

Попри смачней вечери и добрих гудацох котри ше зменьовали на бини, вецей як 200 госцох и патрачох, медзи котрима були и член Совиту за национални меншини РГ Звонко Костелник, Представнїца рускей националней меншини Осиєцко –бараньскей жупаниї Агнетка Балатинац як и священїк грекокатолїцкей парохиї зоз Осиєку о.Любомир Стурко, у добрим росположеню вихасновали час котри мали на розполаганю у „шечеранским доме“ по остатню секунду.

Манифестация „Дравски габи“ отримує ше зоз финанцийну потримовку Совиту за национални меншини РГ и городу Осиєку а у орґанизациї КУД Руснацох Осиєк.

Вецей о „Дравских габох“ сце годни пречитац у 166. числу Новей думки котре у пририхтованю.

Агнетка Балатинац

(аба)