На нашо боки положени даскельо новши числа Новей думки 

ЦО НОВЕ ?

Миклошевци, 27. и 28. авґуст 2011.

фото албум манифестациї

фото албум
 „Вечар рускей писнї“

Янко Джуджар
I место у поєдинєчним
змаганю

Побиднїцка екипа зоз Руского Керестура зоз водительками зоз Миклошевцох.

З лїва на право: Мирко Фекете, Сандра Лїкар, Янко Джуджар, Ана Бучко и Златимир Рамач
 

Екипа бициґлистох и технїчна потримовка зоз Керестура
З лїва на право:Славко Надь, Йовґен Медєши ст.,Владимир Бесерминї, Михайло Пашо и Славко Пап

Служба Божа у Миклошевскей церкви котру служел парох Яким Симунович

Алекса Павлешин спред Дружтва за українску културу  представел малярски опус Тараса Шевченка

Владимир Провчи з Матульох (у штредку) виложел тогорочни малюнки под назву „Приморє“

Делґация манифестациї положела венєц на гроб Юлина Бучка

Подросток КУД „Яким Ґовля“ отворели пополадньову манифестацию

"МИКЛОШЕВЦИ 2011"
 

У Миклошевцох ше 27. и 28. авґуста 2010 року отримала традицийна XXVI културна манифестация „Миклошевци 2011“.
У програми под назву „Поздрав ровнїни“ участвовали 10 руски, горватски, українски и мадярски Културно–уметнїцки дружтва зоз Горватскей.

У рамикох Манифестациї всоботу, 27. авґуста, на рибняку Ґрабово миклошевске здруженє пецарошох „Лєняк“ орґанизовало „Медзинародне змаганє у лапаню рибох на дуґов“ на хторим наступели 11 екипи.

Внєдзелю после Служби Божей у просторийох старого дутяну отворени два вистави: Владимир Провчи з Матульох виложел тогорочни малюнки под назву „Приморє“, у технїки акрил на платну, хтори презентовани и на медзинародних смотрох у України и Австриї. Дружтво за українску културу представело писателя Тараса Шевченка у новим шветлу–як уметнїцкого маляра, а автор вистави бул Алекса Павлешин.

Коло поладня по пиятираз до Миклошевцох сцигли бициґлисти зоз Руского Керестура чийо путешествиє ноши назву „По драги наших предкох“.  
У ранших годзинох 28. авґуста зоз Руского Керестура рушели Йовґен Медєши ст., Михайло Пашо и Славко Пап хторих на авту провадзели Владимир Бесерминї и Славко Надь. Дочекали их члени орґанизацийного одбору манифестациї.

Члени Орґанизацийного одбора манифестациї потим пошли на руски теметов у Миклошевцох и положели венєц на гроб Юлина Бучка, длугорочного културного дїяча а котри нєсподзивано умар 2011 року.

На найнащивеншей часци Манифестациї „Поздрав ровнїни“, по привитним слову предсидателя Орґанизацийного одбору Мирослава Гайдука, учашнїкох и патрачох поздравел начальнїк општини Томповци Ґабриєл Куюнджич, хтори наглашел же и надалєй будзе потримовац руску националну меншину и єй културни дїялносци, бо ше на тот способ презентує и свою општину, а програму отворел у мено Совиту за национални меншини РГ Звонко Костелник.

Чесц же би започали пополадньову програну достали члени подростку фолклорней секциї домашнього дружтва, хтори одтанцовали танєц „На желєней травки“ у хореоґрафиї Желька Лїкара, а потим женска шпивацка ґрупа зоз провадзеньом младих гармоникашох Ивана Лїкара, Михаела Сабадоша и Рената Миклоша одшпивали три народни шпиванки под руководзеньом Ани Бучко. Виводзацка фолклорна секция домашнього дружтва ше представела зоз танцом зоз восточней Словацкей „Виходняре“ у хореоґрафиї Златка Гирйовати.

Члени КУД „Яким Гарди“ зоз Петровцох, младша ґрупа, виведли „Буковинску полку“ и „Полївски танци“, а старша ґрупа танєц „Куцкуруши“ у хореоґрафиї Звонка Костелника. Госци зоз Долнього Видовцу зоз околїска Чаковцу виведли венчик медзимурских танцох и шпиванкох, а члени КУД „Петефи Шандор“ зоз сушедних Чаковцох ше предтавели зоз мадярскима шпиванками и танцами.
Члени домашнєй женскей шпивацкей ґрупи наступели ище раз и барз успишно одшпивали три шпиванки– „У заградочки шалата“, „Ишло дзивче“ и „Дай нам боже“.

По першираз у Миклошевцох госцовали и аматере КУД „Славко Мадєр“ зоз Церичу. Вони ше представила зоз славонскима танцами и шпиванками. Под фаховим руководзеньом Зорана Циковца винковске дружтво Руснацох и Українцох одшпивало три народни шпиванки. Члени КУД „Осиф Костелник“ зоз Вуковару одшпивали два шпиванки, а танєчна ґрупа одтанцовала два танци у хореоґрафиї Звонка Костелника. Шпивацка ґрупа петровского дружтва „Руснак“, одшпивали шпиванки „Нє пий коню воду“ и „Явор, явор“ хтору за наступ пририхтали Ана Бучко и Наталия Гнатко. Госци зоз Шумеча, КУД „Андрий Пелих“, танцовали танєц „Повзунєц“, а шпивацка ґрупа одшпивала два народни українски шпиванки. Пополадньову програму, хтору водзела Сандра Лїкар, закончел дует Вера и Владимир Провчи спред дружтва „Рушняк“ зоз Риєки.

Внєдзелю вечар ше под назву „Вечар рускей писнї“ патрачом представели члени руских дружтвох зоз Миклошевцох, Петровцох, Вуковару и Осєку. Векшина учашнїкох була млада, дзивчата и дзеци, цо дава надїю же ше пестованє рускей народней шпиванки предлужує.

Зоз дзецинску шпиванку „Заспала мала Ганїчка“ пред патрачох вишол трио Анамария Лїкар, Сабина Ждиняк и Кристиян Миклош. На гармоникох их провадзели Иван Лїкар и Ренато Миклош. Женски квартет домашнїх Нада Батакович, Ана Бучко, Любов Колєсар и Леся Мудри виволали спонтане кляпканє и їх шпиванє було на високим уметнїцким уровня. Вони одшпивали „а капела“ „Дує витор дує“ и „Дунай, Дунай“. Ана и Гелена Бучко одшпивали народну шпиванку „Зашвицело ярнє слунко“ зоз провадзеньом Бориса Бучка на гармоники. Вец ше шоровали зоз Петровцох: Марияна Вовк и Анита Надь одшпивали „Ганчо нє дримкай“ и „А я пасла на Дунаю пави“ и Михал Голик (Грайце лєм гудаци, грайце), провадзел их народни орхестер КУД „Яким Гарди“, з Вуковару трио Оливера Югас, Вероника Мудри и Мария Русин (Явор, явор“ и „Била ружа“), спред дружтва „Руснак“ шпивала Ивона Гнатко зоз Петровцох („Червена ружичка“), спред КУД Руснацох Осиєк шпивали: дует Лела Дїтко–Ромко Гаргай (Нє зрубуй нє сцинай), квартет Владо Еделински, Мирко Рибич, Зденко Сивч и  Янко Чордаш (Ей, дзивчата чуєце) и дует Ромко Гаргай–Зденко Сивч (Америцки мен) а провадзела их тамбурова оркестра КУД Руснацох Осиєк под руководзеньом Рудолфа Ерґотича. На концу вечаршей програми дует Ана и Гелена Бучко одшпивали шпиванку „Моя калїно“ и Гелена Бучко „Писнї сон“ зоз провадзеньом на клавиру Ани Бучковей и на контрабасу Борис Бучко.

Конферансу внєдзелю вечар водзела Лєся Мудри.              

Стретнуце шпивачох, тамбурових оркестрох, танцошох и почитовательох нашей традициї орґанизовало КУД „Яким Ґовля“ зоз финанцийну потримовку Совиту за национални меншини Горватскей, хтори бул и покровитель, та сопокровительох Жупана ВСЖ, општини Томповци и Союзу Русинох и Українцох Горватскей.

 (клї/аба)