Миклошевци, 6.  новембер 2011

Покладанє венцох

Шветочна схадзка и промоция кнїжки

Шветочна Академия

 ПРЕСЛАВЕНА 160 РОЧНЇЦА ПРИСЕЛЄНЯ РУСНАЦОХ ДО МИКЛОШЕВЦОХ

У Миклошевцох, внєдзелю, 6. новембра,   отримана шветочносц з нагоди 160-рочнїци приселєня Руснацох до Миклошевцох.

Програма почал зоз службу Божу а предлужела ше у пополадньових годзинох зоз Шветочну схадзку. На шветочней схадзки, попри визначних госцох зоз општини Томповци,општини Стари Янковци, месного одбору, та висланїка Крижевского владики, бул назочни и жупан Вуковарско - сримскей жупаниї Божо Ґалич котри бешедовал о значносци мултиетнїчносци на тих просторох и наглашел же Жупанїя вше ма слуха за потреби националних меншинох а як приклад тому то и конкретни роботи коло подзвигованя стандарду з меншинским жительством. Реферати о присельованю Руснацох до Миклошевцох пречитали Дюра Лїкар по руски и Агнетка Балатинац по горватски.
У другей часци Шветочней схадзки отримана  промоция кнїжки Дюри Лїкара “Колїше ше жито класате - ґаздованє миклошевских Руснацох”.
Модератор була Агнетка Балатинац а о кнїжки бешедовали рецензент Звонко Ерделї, совидаватель Ирина Папуґа, та сам автор док виривки зоз кнїжки читали два учительки котри тераз у пензиї алє скоро цали свой роботни вик препровадзели у Миклошевскей школи, Мария Папуґа и Ксения Лїкар.
То осма кнїжка о Миклошевцох и Миклошевчаньох котру написал тот хронїчар а аналитичаре вираховали же шицки тоти кнїжки и брошури маю вєдно вецей як 1700 боки и прейґ 500 фотоґрафиї.
На концу промоциї, Ирина Папуґа, у мено Дружтва за руски язик, литературу и културу зоз Нового Саду додзелєла припознаня членом того Дружтва а котри зоз Горватскей, та презентовала виданя и подзелєла по даскельо прикладнїк шицким членом Дружтва а окремни дарунки припадли учительови Лїкарови, учительки Ксениї Ликар як и паноцови Якимови Симуновичови.
На промоциї були и Агнета Бучко Папгаргаї и Штефан Гудак, и сами родом зоз Миклошевцох а котри ше у своїх литературних творох часто врацаю на тему Миклошевцох.

У културно-уметнїцкей програми котра почала на 16 годзин участвовал подросток КУД „Яким Ґовля“, школяре ОШ Чаковци, подручней школи Миклошевци котри виучую руски язик а котрих пририхтала учителька Илона Грецешин. Вони читали писньочки зоз дакедишнїх Пионирских заградкох у котрих обявйовали Миклошевчанє котри нєшка уж одроснути людзе а велї з нїх уж и дїдове лєбо баби. Наступели и еминентни шпиваче медзи Руснацами, Весна Надь и Андреа Бучко з Руского Керестура, Танита Ходак з Коцура, Мирослава Даждиу и Йовґен Надь з Нового Саду, як и домашня Женска шпивацка ґрупа. Провадзел их  Народни оркестер Дому култури Руски Керестур.

Академия почала зоз шпиванку „Миклошевци, мойо мили“ у виводзеню Мирослави Даждиу и Йовґена Надьа а котра свойофайтова „гимна“ миклошевскей манифестациї котра у предвойнових рокох була єден од найлєпше орґанизованих фестивалох на тих просторох, а у очох велїх нащивительох заблїскотали слизи. То, по велїх рокох, першираз же ше тоту писню чуло у интерпретациї „ у живо“ и зоз провадзеньом єдней такей професийней оркестри. 
Шицких присутних привитал началнїк општини Томповци Ґабриєл Куюнджич и висланїк крижевского владики кир Кекича, миклошевски парох и декан Сримски о. Йоаким Симунович.

Барз удатну програму котра була преткана зоз писню, рецитацию, и виривками зоз прешлосци Руснацох а котру водзела Ксенїя Лїкар мл., провадзела преполна сала Дружтвеного дому.

На концу, нащивителє и виводзаче одшпивали вєдно, Миклошевчаньом, Миклошевцом и шицким Руснацом  „Могая лїта“ а присутним ше на концу програми задзековал предсидатель месного одбору Дюра Бики, док медзигранїчне сотруднїцство привитал предсидатель Националного совиту Руснацох Сербиї Славко Рац, источашнє даруюци КУД „Яким Ґовля“ капиталне дїло, кнїжку нотних записох з дотерашнїх “Червених ружох”.

Медзи иншима, Академию провадзели и представнїк Руснацох у Совиту за национални меншини РГ, Звонко Костелник, предсидателька Союзу Русинох и Українцох РГ Любица Морган, а од госцох з иножемства була присутна Олена Папуґа, заступнїца у Парламенту Сербиї. Понеже то источашнє и ювилей школи и церкви, велї назочни були и з того фаху та простория дзє ше Академия отримовала, була скоро прецесна за шицких зацикавених.

Мушиме похвалїц медийну потримовку тей значней рочнїци, рускей редакциї РТ Войводини, як и редакциї Руского слова, Рутенпресу и Новей думки.

Агнетка Балатинац

(аба)