Петровци, 2. октобер 2011

крадки филм

ПЕТРОВСКА ПАРОХИЯ НАПОЛНЄЛА 175 РОКИ

ШВЕТОЧНОСЦ У ПЕТРОВСКЕЙ ЦЕРКВИ

Цали 2011. рок, Петровска парохия означує, на окремни способ, бо то рок кед наполнєла 175 роки.

У Петровцох, 2. октобра 2011 року у церкви Покрову Пресвятей Богородици, преславене Храмове швето и шветочно означена 175. рочнїца Петровскей парохиї.

Вельку Архиєрейну Службу Божу на 11 годзин служел Апостолски еґзарх за Сербию и Чарну Гору, преосвящени владика кир Георгий Джуджар а сослужовали: о. Яким Симунович, парох миклошевски, о. Владимир Маґоч, парох вуковарски, о. Яким Дудаш, паноцец у пензиї, о. Владислав Рац, парох коцурски, о. Дарко Рац, парох бачински, о. Михайло Режак, парох шидянски, о. Йосип Вранчич римокатолїцки паноцец родом з Товарнїку, а познєйше ше придружел и паноцец зоз сушедних Янковцох о. Мато Шполяр.

Шветочносц, зоз прекрасним шпиваньом звелїчали часни шестри Василиянки як и часни шестри Служебнїци Пресвятей Богородици.

По Архиєрейней Служби Божей ушлїдзел отпустови обход коло церкви а на шицки штири боки швета ше читали Евангелиї. Владика кир.Джуджар потим поблагословел церкву и шицких вирних.

На Архиєрейней Служби Божей було присутне и вельке число еминентиних особох зоз дружтвено политичного животу медзи котрима були: Мато Ґолубичич, заменїк жупана Вуковарско-сримскей жупаниї, Ярослав Медєши, заменїк начальнїка опчини Боґдановци, Витомир Мудри, заменїк начальнїка опчини Томповци, Томислав Рац, предсидатель месного одбору Петровци, Любица Морган, предсидателька Союзу Русинох и Українцох РГ, Яким Ерделї, предсидатель Ради рускей нациналней меншини Вуковарско-сримскей жупаниї, Наташа Вовк, представнїца українскей националней меншини Вуковарско-сримскей жупанї, Агнетка Балатинац, представнїца рускей нациналней меншини Осєцко-бараньскей жупаниї, Мирослав Колбас, предсидатель КУД-а “Яким Гарди” Петровци и Наталия Гнатко, представнїца Дружтва “Руснак” Петровци.

Домашнї парох, мр.сц.Владимир Седлак, по законченей Процесиї, поволал шицких госцох на коктел скорей шветочного полудзенку и представел ВИС „Христове ято“, дзивки зоз Петровцох котри на нєдавно отриманим медзинародним фестивалу духовней музики „Хосана-Фест“ у Суботици, на першим наступу освоєли друге место зоз шпиванку истей назви як и їх состав – „Христове ято“.

Кирбай мал и богату забавно вашарску часц а по длугим часу, того року поставени и забавни парк за дзеци зоз колїмбачками и авточками.

Агнетка Балатинац