Осиєк, 30. октобер 2011

презентация

ПРЕСЛАВЕНЕ ХРАМОВЕ ШВЕТО

У Осиєку, у церкви Христа Царя, 30. октобра преславене храмове швето.

Пред полну церкву вирнїкох, святочну Литурґию предводзел о.Иван Барщевски, славонско бродски парох, декан Славонского деканату та викар Славонско-сримского викарияту Крижевского владичества а сослужовали исусовец о.Иґнац Чижмешия, о.Мато Ґашпарович, парох парохиї св.Кирила и Метода зоз Осиєку, о.Василь Крен, парох зоз Липовлянох, о.Йоаким Дудаш, священїк у мировини зоз Осиєку, та домашнї парох, о.Любомир Стурко. Апостол читал Назар Стурко, Евангелию о. Любомир Стурко а наказовал о.Иван Барщевски. Еухаристийну Службу Божу зоз шпиваньом звелїчали домашнї шестри Василиянки и їх госци.
По Служби Божей було мированє а вец шестри Василиянки, у рамикох чийого манистара ше находзи и церква Христа Царя, погосцели парохиянох и їх госцох зоз колачами, соком и кафу. У друженю и добрим росположеню, вирнїки мали нагоду побешедовац медзи собу а и купиц рижни набожни артикли котри шестри Василиянки робя у своїм манастире. Понеже нєт звичайни кирбайски шатри коло церкви, як то звичай у других местох, приємно нєсподзивала тота инициятива часних шестрох.

Дзень скорей швета Христа Царя, парохию и манастир часних шестрох Василиянкох, у своїм паломнїцким обходу грекокатолїцких парохийох, нащивели вирнїки Новосадскей парохиї св.Петра и Павла зоз своїм парохом о.Романом Мизом и предсидательом церковного одбору Славком Джуджаром. По крадкей окрипи котру им порихтали шестри Василиянки, нащивели музей котри шестри маю у рамикох свойого манастира а вец присуствовали и активно ше уключели до Вечурнї пред шветом Христа Царя. По Вечурнї, шицки вєдно, винчовали ч.с.Анастазиї имени дзень зоз традицийним шпивом „Многая лїта“.

Агнетка Балатинац

  (аба)