|
|
|
|
|
|
|
|
|
|
|
|
Свиднїк, Словацка 18.-20.
юна 2004. |
|
|
 |
50 роки фестивалу
Русинох и Українцох Словацкей
На фестивалу наступел ансамбл Союзу
Русинох и Українцох Републики Горватскей, а тиж так и Руске
културно просвитне дружтво зоз Нового Саду. |
|
|
|
 |
Централна рада Союзу Русинох-Українцох Републики
Словацкей зоз Прешова була орґанизатор того ювилейного
фестивалу, док место Свиднїк, Прешовска самоуправа, реґионални
уряд у Свиднїку, Подуклянски културни штредок у Свиднїку и
Словацки народни музей - Музей українско-рускей култури у
Свидїку були соорґанизаторе фестивалу, хтори ше отримал од пиятку
18. юна по нєдзелю 20. юна у Свиднїку.
Манифестация започала пияток на 14 годзин отвераньом виставох
фотоґрафийох и плакатох зоз прешлих 49 фестивалох, а предлужела
ше зоз програму "Танцуйце з нами", дзе ше представели рижни
фоклорни и шпивацки ґрупи.
Всоботу дополадня фестивал започал зоз святочну схадзку, дзе
подзелєни припознаня за заслуги и розвой свиднїцкого фестивалу,
а наставел ше пополадню зоз покладаньом венцох и квеца при
памятнїкох погинулим чешким, словацким и совєтским вояком на
Дуклї и Свиднїку.
Пред вечаром започала програма "На веселу ноту", у хторей
концерт отримал фоклорни ансамбл "Шаришан". Такой затим започал
треци програм "Зоз жридлох наших предкох" дзе у штвартей часци,
аж на пол другей рано
наступели нашо Руснаци зоз Горватскей и дзивоцка ґрупа РКПД-а
зоз Нового Саду.
Внєдзелю после святей служби хтора отримана у древеней церкви, а
находзи ше у "Сканзену" - валалу музею отримана
фоклорно-етноґрафска програма "Скарби народу", дзе наступели
даскельо фоклорни ґрупи.
Пополадню у остатнєй програми "Писнї моєй жеми", у штвартей
часци хтора ношела назву "Дарунок на памятку" ознова наступел
ансамбл Союзу Русинох и Українцох РГ зоз танцом "Венчик руских
танцох и писньох" у кореоґрафиї Звонка Костелника. Участвовали
члени КУД-а "Яким Гарди" зоз Петровцох, КУД-а "Яким Ґовля" зоз
Миклошевцох, КУД-а "Осиф Костелник" зоз Вуковару и КПД-а Русинох
и Українцох зоз Осиєку. Ту ше случело и єдно крашнє
нєсподзиванє. Почим ансамбл зоз Горватскей мал лєм двох гудакох
помогла им оркестра РКПД-а зоз Нового Саду, хтори тиж так
наступели зоз дзивоцку шпивацку ґрупу.
На тим ювилейним 50. Швету култури Русинох-Українцох Словацкей
участвовало 1137 учашнїкох зоз Словацкей, Польскей,
України,Сербиї и Чарней Гори, Горватскей, Нємецкей и Чешкей. |
|
|
|
 |
Зоз историї фестивалу
Перше "Швето култури Руснацох и Українцох Словацкей отримане 4 -
5 юна давного 1955. року у Медзилаборцох. Културне представянє
народних писньох, танцох и музики теди представело 52 дружтва, а
участвовало коло 1780 учашнїкох. Шицких других рокох, аж по
нєшка, фестивал ше отримує у Свиднїку. Окрем Словацких дружтвох
на другим фестивалу були госци зоз Польскей, а нашло ше коло
7000 патрачох.
1958. року пред 4 фестивалом реконструовал ше и преширел
амфитеатер у Свиднїку. Уж теди пришло коло 10 000 патрачох.
Дзешец рочнїца преслави отримана 1964. року, а була з нагоди 150
рочнїци народзеня Тараса Шевченка и 20 рочнїци ошлєбодзеня од
фашистичней окупациї.
Початком 80-тих рокох фестивалски програми провадзи и Словацка
телевизия.
Найвекша нащива патрачох була замеркована 1972. року кед
фестивал пришло патриц аж 48 000 людзох.
У тих 50 роки историї фестивалу на нїм наступело коло 500
професийних и аматерских дружтвох, зоз коло 60 000 учашнїкох,хторих
зоз музику танцом и писню видзело коло милийон патрачох.
Свиднїцке швето як стална традиция преслави култури Руснацох и
Українцох прешовского краю, нє є лєм место стретнуца Руснацох и
Українцох Словацкей, алє и зоз других сушедних и европских
жемох, як цо Польска, Чешка, Україна, Мадярска Румуньска, Сербия
и Чарна Гора и Горватска, а тиж так и зоз Канади и ЗАД-у. |
|
|
|
|
|
|
|
|
|
|
|
|
|
Линки
Фестивал
2001. року
Фестивал 2003. року
Музей
українско-рускей култури
Место Свиднїк
Веб боки Свиднїка
Реґия Шариш
 |
